>➤ Arab ke Mazaahib :-
✥═══════════════ ✥
Arab me Islam se pehle Mukhtelaf (Alag Alag) Mazaahib the, Baaz ka Khyaal tha ki Jo Kuchh he Zamana ya Fitrat (Qaanune Qudrat) he, KHUDA koi Chiz Nahi,
Inhi Lougo ki Nisbat Quraane Majeed me he
“Aur ye Loug kehte he ki jo Kuchh he Humaari Duniya ki Zindagi se Hum Marte Aur Jeete he Aur Hum ko Maarta he to Zamana Maarta he”
(Surahtul Jasiya, Aayat-24)
>> Baaz KHUDA ke Qaayal the Lekin Qayaamat Aur Jaza Aur Saza ke Munkir the, Unke Muqaable me Quraane Majeed ne Qayaamat ke Saboot par Is Tarah Istedlaal kiya he
“Kehdo ki Wahi Dobara Zinda karega Jisne Pehli Dafa Peida kiya tha”
(Surah Yaasin, Aayat-79)
>> Unka Khyaal tha ki Agar Koi Paigambar ho Sakta he To Usko Farishta hona Chahiye Jo Haajat e Insaani(Insaani Zaruriyaat) se Munazza(Paak) ho,
“Kehte he ki Kya KHUDA ne Aadmi ko Paigambar Bana kar Bheija he”
(Surah Bani Israail, Aayat-94)
>> Umuman(Aksar) Loug But-Parast the Wo Buto ko KHUDA nahi Samajhte the Balki Kehte the ki But(Murti) KHUDA Tak Pahonch ne ka Zariya he
“Hum Un Buto ko Sirf Is liye Pujte he ki Humko KHUDA se Qareeb karde”
(Surahtul Zumur, Aayat-3)
>> Qabila e Hameer Jo Yaman me Rehta tha Aaftaab-Parast (Suraj ki Puja karta) tha, Kenaana Chaand(Moon) ko Pujte the, Qabile e Bani Tameem Ubraan Ki Ibaadat karta tha, Isi Tarah Qais Setaara E Sheeri ki, Qabila e Asad Otaarid(Mercury) ki Aur Lakhum wa Juzaam Mushtari (Suraj ke Baad Sabse Bada Setaare) ki Parastish(Puja) karte the.
(Seerate Mustafa Jane Rehmat ﷺ, Jild-1, Safa-132,133)
>➤ Arab me But-Parasti ka Rivaaj Aam hona :-
✥═════════════════════════════ ✥
Sabse Bada But(Murti) Habal tha, Jo Ka’ba ki Chhat par Mansub(Rakha) tha, Quraish Ladaaiyo me Usko Pukaarte the, Arab me But-Parasti ka Baani(Shuru Karnewala) Ek Shaksh Amr Bin Lahi tha, Uska Asli Naam Rabiaa Bin Haarsa tha, Arab ka Mashoor Qabila Khiza Usi ki Nasl se he, Amr se Pehle Jarhum Ka’aba ka Mutavalli(Trustee) the, Amr ne Lad kar Jarhum ko Makka se Nikaal diya Aur Khud Haram ka Mutavalli ho gaya, Woh Ek Dafa Sham(Mulke Sham) ke kisi Shahar me gaya, Waha ke Lougo ko But Poojte deikha To Puchha ki Inko Kyu Pujte ho..? Unhone kaha Ye Haajat-rawa (Zarurat Puri Karnewala) he, Ladaaiyo me Fatah(Kaamyaabi) dilata he, Qahat(Sukha) Padhta he to Paani Barsaate he, Amr ne Chand(Kuchh) But Unse le Liye Aur la kar Ka’aba ke Aas-Paas Qaayam kiye, Ka’aba Chunki Arab ka Markaz tha Is liye Tamaam Qabaail(Qabilo) me But-Parasti ka Rivaaj ho gaya, Unme Sabse Qadeem(Purana) But “Manaat” tha, Ye Samandar ke Kinaare Qadir ke Qarib Nasb(Rakha) tha, Madeena Ke Loug Isi par Qurbaani Chadhate the Aur Jab Ka’aba ka Hajj karke Aate the to Ahraam Yahi Utaarte the,
Yaaqut Humvi ne Zikre Makka me likha he ki Arab me But-Parasti ki Aaam Isha’at(Tablig) ki Wajah ye hui ki Qabaail e Arab(Arab ke Qabile) Jo Tamaam Atraaf(Simto/Taraf) se Hajj ko Aate the, Waapas Jate hue Haram ke Pathharo ko Utha leite the Aur Unko Asnaame Ka’aba(Ka’aba ka But/Murti) ki Surat par Taraash(Bana) kar Unki Ibaadat karte the.
(Seerate Mustafa Jane Rehmat ﷺ, Jild-1, Safa-133, 134)
>➤ Aqeeda E Touhid Aur Arab :-
✥═════════════════════ ✥
Arab-go(Arab ke Loug) Qariban Sabke Sab But-Parast the Lekin Uske Sath ye Ayteqaad (Yaqeen) Unke Dil se kabhi Nahi gaya ki Asali KHUDA E BARTAR Aur Chiz he Aur Wahi Tamaam Aalam ka Khaaliq he, Is Khaliqe Akbar ko Woh ALLAH kehte the Quraane Majeed me he
“Aur Agar Tum Unse Puchho kisne Banaaye Aasmaan Aur Zameen Aur Kaam me Lagaaye Suraj Aur Chand to Zarur Kahenge ALLAH ne To Kaha Undhe Jate he”
(Surahtul Ankaboot, Aayat-61)
“Fir Jab Kashti me Sawaar hote he ALLAH ko Pukaarte he Ek Usi par Aqeeda la kar Fir Jab Wo Unhe Khushki ki Taraf Bacha lata he Jabhi Shirk karne lagte he”
(Surahtul Ankaboot, Aayat-65)
Quraane Kareem ne 1400 Pehle Jis Haqiqat ka Izhaar kiya he Aaj Tehqeeqaat Aasaare Qadeema bhi Uski Tasdeeq Karti he.
(Seerate Mustafa Jane Rehmat ﷺ, Jild-1, Safa-134,135)
>➤ Arab me Nasraaniyat,Yahudiyat Aur Majusiyat :-
✥═════════════════════════════════ ✥
Ye 3no Mazhab Ek Muddat se Arab me Raaij(Jaari) ho Chuke the,
Allama Ibne Qutaiba ne Ma’arif me likha he ki Qabaaile Rabi’aa wa Gesaan Nasraani the, Qaza’a(Qabila e Qaza’a) me bhi Is Mazhab ka Asar Paya jata tha, Nasraaniyat ko Is Qadr Taraqqi (Haasil) ho chuki thi ki Khud Makka e Moazzama me Ayse Loug Moujud the (Masalan Warqa Bin Noufeil) Jo Ibraani Zabaan me Injeel ko Padh Sakte the, Muta’adid (Kayi) Ayse Loug the Jinhone Sham(Mulke Sham) me Ja kar Ta’alim Payi thi,
Madeena E Munawwara me Yahud ne Pura Galba(Qaabu) Pa liya tha Aur Touraat ki Ta’alim ke liye Muta’adid (Kayi) Darsgaahe Qaayam thi Jinko Beitul Madaaris kehte the, Qilla e Kheibar ki Tamaam Aabadi Yahud thi,
Ahle Kitaab ki Riwaayate Makka me Is Qadr Rivaaj pa Chuki thi ki HUZOOR SARWARE QOUNEN Sallallaho Alayhe Wasallam par Jab Quraan Naazil huwa tha Aur Isme Bani Israail ke Waaqiyaat Mazkur(Bayaan) hote the to Kuffar Bad-Gumaani karte the ki koi Yahudi Ya Isaayi Aapko Sikhata he..,
Quraane Kareem me he
“Aur Beishak Hum Jaante he ki Woh kehte he ye to Koi Aadmi Sikhata he”
(Surah Nahal, Aayat-103)
Quraane Kareem me Is Khyaal ka Ibtaal(Radd) kar diya gaya he,
Aur Qabila e Banu Tameem Majusi tha,
(Seerate Mustafa Jane Rehmat ﷺ, Jild-1, Safa-135,136)
>➤ Ahle Arab Aur Mazhabe Haneefi :-
✥═══════════════════════ ✥
Deene Ibhraahim ki Ummul Usool Touhid Khalis thi, Zamana ke Imtedaad (Khinchaao) Aur Jahaalat ke Andhero se ye Usool Agarche Shirk-Aalud(Shirk me Mubtala) ho gaya tha, Yaha Tak ki Khud Khana e Ka’aba me Buto ki Parastish (Ibaadat) hoti thi, Taaham(Fir bhi Touhid ka Usul) Bilkul Fana Nahi ho Sakta tha, Jo Loug Saahibe Basirat the Unko ye Nazariya Nafrat-Angez(Nafrat ke Qaabil) Ma’alum hota tha ki Insaan Aaqil, Jamad(Bejaan Chizo) ke Saamne Sar Jhukaaye, is Bina par But-Parasti ki Buraai ka Khyaal Bahot ke Dil me Aaya, Lekin Iska Taarikhi Zamana HUZOOR SARWARE KOUNEIN Sallallaho Alayhe Wasallam ki Bee’sat(Risaalat ka Zamaane) se Kuchh hi Pehle Shuru hota he,
Ibne Ishaaq ne likha he ki Ek Dafa kisi But ke Salana Meila me Warqa Bin Noufeil, Abdullah Bin Hajash, Usmaan Bin Huris Aur Zaid Bin Amr Bin Noufeil Shareek the, In Lougo ke Dil me Daf’atan(Achaanak) ye Khyaal Aaya ki Ye Kya Beihuda-Pan he ki Hum ek Patther ke Saamne Sar Jhukate he Jo Na Sunta, Na Deikhta he, Na kisi ko Nukshan kar Sakta he Aur Na kisi ko Faayda Pahoncha Sakta he, Ye 4ro Quraish ke Khandaan se the,
Zaid Deene Ibhraahimi ki Talaash me Sham(Mulke Sham) gaye, Waha Yahud Aur Isaayi Paadariyo se Mile, Lekin Kisi se Tasalli Nahi hui Isliye Is Ijmaali Ayteqaad(Achhe Yaqeen) par Iktefa Kiya ki “Mai Ibhraahim ka Mazhab Qabool karta hu”
Ahle Arab Ladkiyo ko Zinda Dafn kar deite the, Zaid hi Pehle Shaksh he Jinhone Is Rasm ki Mumaanat(Rok-Tok) ki, Jab Koi Shaksh Aysa Iraada karta To woh Ja kar Us Ladki ko Maang leite Aur Khud Uski Parwarish karte,
Usi Zamaane ke Qareeb Umayya Bin Abi Salt ne jo Taaif ka Raees Aur Mashoor Shayar tha, But-Parasti ki Mukhaalifat ki, Umayya ne Zamaana e Jaahiliyat me Aasmaani Kitaabe Padhi thi Aur But-Parasti Chhod kar Deene Ibhraahimi Ikhteyaar kar liya tha,
Ye Amr(Kaam) Aksar Riwaayato se Saabit he ki Arab Aur Khususan Makka Aur Madeena me Muta’adid (Kayi) Loug But-Parasti ke Munkir ho gaye the Aur Millate Ibhraahimi (Deene Ibhraahimi) ki Justaju(Talaash) me the, Ye Is liye ki Mujaddid E Millate Ibhraahimi(Ya’ani HUZOOR NABI E KAREEM Sallallaho Alayhe Wasallam) ke Zahoor ka Waqt Qareeb Aa gaya tha.
(Seerate Mustafa Jane Rehmat ﷺ, Jild-1, Safa-136-138)
>➤ Arab Mazaahib me Be-Ahtedaliya :-
✥═════════════════════════ ✥
Jeisa ki (Aage) Bayan huwa Arab me Tamaam Mashoor Mazaahib the, Yahudiyat bhi, Nasraaniyat bhi, Majusiyat bhi, Haneefiyat bhi Aur ilhaad(Kufr) bhi,
Buto par Aadmiyo ki Qurbaani Chadhayi Jati thi, Baap ki Mankuha (Zouja/Bivi) Beite ko Wiraasat me milti thi, Haqeeqi Behno se Ek Sath Shadi Jaiz thi, Azwaaj (Biviyo) ki koi Hadd Na thi, Qemaar-Baazi(Juwa), Sharab-Khori, Zina-kari ka Rivaaj Aam tha, Be-Hayaai ki ye Haalat ki Sabse Bada Namur Shayar Umro Qais jo Shahzada bhi tha, Qasida me Apni Fufizad Bahen ke Sath Apni Badkaari ka Qissa Maze le le kar Bayan karta he Aur Ye Qasida Ka’aba par Aaaviza(Latka) Kiya jata he,
Ladaaiyo me Lougo ko Zinda Jala deina, Musturaat(Aurato) ka Peit Chak(Chir) kar Daalna Aur Be-kashur Baccho ko Maarna Umuman Jaiz Samjha jata tha,
Ye Haalat Sirf Arab ke Sath Makhsus (Khas) Na thi, Balki Puri Duniya me Yahi Taarikhi(Andhera) Chhayi hui thi,
(Seerate Mustafa Jane Rehmat ﷺ, Jild-1, Safa-138,139)
Kya Is Zulmat ko Mitaane ke liye Ek Aaftaab ki Zarurat Na thi..??
Bus Usi Aaftaab ko HUZOOR NABI E KAREEM Sallallaho Alayhe Wasallam Kaha jata he..
>➤ Ahle Arab ki Quwwate Haafeza
(Yaad-Daasht/Yaad Rakhne ki Taaqat) :-
✥════════════════════════ ✥
Fahm wa Farasat ki Ne’amat ke Alawa ALLAH TA’ALA ne Ahle Arab ko Be-Panah Quwwate Haafeza Arzani Farmayi thi, Agarche wo Likhne Aur Padhne se Aadi the, Lekin Apni Yad-dash ke Bal Bute par Unhone Apni Jango Aur Digar Aham Waaqiyaat ki Tafsilaat(Waazeh Bayan) ko Mahfuz Rakha,
Woh Sirf Apne Silsila e Nasab (Khandaani Silsila) se hi Puri Tarah Ba-Khabar Na the, Balki Apne Ghoudo(Horse) ke Naam Aur Unke Nasab Naamo ko Puri Tarah Jante the, Jo Ghoda Maidaane Jang me Geir-Ma’muli, Suja’at (Bahaduri) Aur Kaar-kardgi(Kaam ki Khubi) ka Muzaahira(Izhaar) karta Uske Nasab se Wo Puri Tarah Waaqif rehte the,
Unke Tehwaro me jo Adabi Mehfile Muna’aqid hoti thi Jinme Door-Daraaz se Aaye hue Fush’haa wa Balga’a Apne Qaseede Sunaate Ya Apne Khitaab se Lougo ke Dilo ko Mouh leite, Soonne Wale Ek Baar Soonne se Woh Pura Qaseeda Aur Pura Khutba Azbar(Hifz/Yaad) kar leite, Fir Woh Is se Aage Riwaayat karte rehte,
Har Shayar ka Ek Ravayya huwa karta Jis ka Kaam ye tha ki Shayar ki Zubaan se Nikalne wala Har Sheir Woh Yaad kar leita,
Unke Ha Shahad(Honey) ke 80 Naam he, Saanp ke 200, Sheir ke 500, Unt ke 1000, Talvaar ke bhi 1000 Aur Aalam wa Masaaib(Bahot Zyada Musibate Aur Pareshaniyo) ki Ta’abir ke liye 4000 Alfaaz he,
In Tamaam Asma’a(Naam) ko Yaad kar leina Qawi Haafza (Mazbut Yaad-Daasht) ke Bageir Mumkin Nahi, Ahle Arab ko Qudrat ne jo Zehaanat(Samajhdaari) Aur Quwwate Haafza Ataa Farmaayi thi Iska Inkaar Mumkin Nahi.
(Seerate Mustafa Jane Rehmat ﷺ, Jild-1, Safa-142,143)
Subhan Allah…
>➤ Arab me Shadi Biya ke Tariqe :-
✥══════════════════════ ✥
Shareef Qabaail(Qabeelo) me to Shaadi-Biyaah ka Yahi Tareeqa tha Jisko Islaam ne bhi Jaiz Qarar diya ki Ladke ke Varsa Ladki ke Paas Jate Aur Unse Rishte ki Darkhwaast karte Aur Agar Woh Unki Is Darkhwaast ko Qabool karte to Ladke ke Rishtedaar Azhad Mamnun (Behad Ahesaan-Mand) Wa Shukr Guzaar hote, Ladki ka Mahar Muqarrar kiya Jata Majlis Nikaah Munaqqid hoti Aur Ladki ke Waalidein (Maa-Baap) Neik Tamannao ke Sath Apni Ladki ko Rukhsat karte,
Lekin Is Nikaah ke Alaawa Rishta e Zoujiyat(Nikaah) ke Ineqaad ke Aur bhi Muta’adid (Kayi) Tareeqe Raaij the, Iski Mukhtelaf Surate thi..
1) Mankuha Aurat(Bivi) Jab Ayyame Haiz(Haiz ke Dino) se Faarig hoti to Uska Khaawand (Shohar) Kisi Shuja’a(Bahadur) Ya Shakhi Aadmi ki Taraf Usko Bheijta Aur Usko Ijaazat deita ki Uske Sath Hum-Bistari kare Aur Us se Uska Maqshad ye hota ki Ek Naamur Aadmi ke Nutfe se Uski Bivi ke Shikam se jo Baccha Peida hoga woh bhi Naamur(Brilliant) hoga Aur Usko Ek Naamur Beite ka Baap Banne ka Ayzaaz Haasil ho Jayega, Ye Surate Haal Dar-Haqiqat Nikaah ki Nahi, Lekin Ahle Arab Isko Nikaah se Ta’abir karte the,
2) Dusra Tareeqa ye tha ki 8-9 Aadmi Ek Aurat ke Paas Ekhatthe hote Aur Uski Raza se Uske Sath Moqaarebat(Milan) karte, Agar Is Moqaarebat se Hamal Thehar jata To Jab Baccha Peida hota to Chand Roz(Din) Baad Un 8-9 Aadmiyo ko Aurat Bula Bheijti thi, Unme se kisi ki Majaal na hoti ki woh Aane se Inkaar kare, Jab woh Uske Paas Ekatthe ho jate to Woh Kehti ki Jo Kuchh Tumne kiya Use Tum Jante hi ho, Us Fe’al(kaam) se Meire Ha Baccha Peida huwa he, Fir Unme se Jiska Naam Chahti (Naam) le kar kehti ki ye Teira Baccha he, Us Aadmi ki Majaal Na hoti ki Woh Inkaar kare, Us Bacche ko Us Aadmi ki Nasl se Mulhaq(Jod) kar diya jata, Ye Us Waqt hota Jab Paida hone Wala Beita hota Aur Agar Beiti Peida hoti to Fir Woh Na Unko Bulaati Na kisi ki Nisbat karti, Kyuki Use Ilm hota ki Ahle Arab Bacchiyo ko Azhad(Behad) Na Pasand karte he Aur Baaz Apni Jaiz Bacchiyo ko Zinda Dargour karne se Baaz Nahi Aate, Ayse Mu’aashre (Insaani Maahol) me Ek Na-Jaiz Bacchi ka Boujh Uthane ke liye kon Taiyyar hoga, Is liye Woh Khamosh Rehti,
3) Ek Tareeqa ye bhi Tha ki Badkaar Aurate Apne Makaano ke Upar Jhande Lehrati, Har Shaksh ke liye Roz wa Shab(Raat Aur Din) Unke Darwaaze khule rehte Aur Badkaari ka Karobaar Jari rehta, Agar Koi Baccha Peida hota to Fir Qeyafa Shanaas(Shaklo-Surat ki Pehchaan rakhne Wale) ko Bulaya jata Aur Jiski Taraf Woh Uske Nasab ki Nisbat kar deita Uska Woh Farzand(Beita) Qarar Pata,
4) Poshida Nikaah :- Aysi Badkaari jo Lougo ki Aankho se Ujhal(Chhipi) ho Woh Buri Nahi Samajhi Jati thi, Lekin Aysi Badkaari ziska Aam Charcha huwa Aur Khulam-Khula huwa Usko Aiyb Aur Kamingi Samjha jata tha,
5) Nikaahe Muta’a :- Iska bhi Aam Rivaaj tha, Isme Gawaavo ke Bageir Aurat Aur Mard Muqarrar Waqt ke liye Muayyana(Taiy kiye gaye) Maal ke Evaz(Badle) Biyaah kar leite the Aur Miya-Bivi ki Heishiyat se Zindagi Basar karte the,
6) Nikaahe Badal :- Unke Ha Ye Tareeqa bhi tha ki 2 Mard Aapas me Ye Taiy kar leite, Ek Dusre ko kehta ki Tu Apni Aurat ko Meire Paas Bheij de Mai Apni Bivi ko Tumhaare Paas Bheij Dunga,
7) Nikaahe Shegaar :- Ek Aadmi Apni Ladki ka Biyaah kisi Mard ke Sath kar deita, Is Shart par ki Woh Mard Apni Beiti Ya Bahan Uske Nikaah me de deiga Aur Dono Apni Biviyo ko Maher Wageira Ada Nahi karenge,
Ye Chand Tareeqe the Jo Unme Muravvaj(Ja’ari) the Aur Jis par Kisi ko koi bhi Mihtam(Pareishan) Nahi Karta tha.
(Seerate Mustafa Jane Rehmat ﷺ, Jild-1, Safa-155-157)
>➤ Bacchiyo ko Zinda Dafna deina :-
✥════════════════════════ ✥
Ek Intehaai Zaalimana Aur Sang-Dilana(Be-Raham) Rasm Arabo me Raaij thi Aur Jisko Baaise Izz wa Sharf (Izzat wa Buzurgi) Samjha jata tha, Woh “Wa’adul Banaat” ki Rasm thi Ya’ani Jab kisi ke Ha Bacchi Peida hoti to Unke Ha Saffe Maatam (Maatam ki Line) Bichh Jati Aur Jab Woh Chand Saal ki ho Jati To Baap Usko Behtareen Kapde Pehnata, Muziyyan wa Aaarasta(Taiyyar-Sajha) karke Jangal me le jata, Apne Haatho se Ek Gehra Gad-dha Khoudta fir Usme Dhakka de kar Us Bacchi ko Feink deita Aur Us par Mitti Daal kar Us Gad-dhe ko Bhar deita, Woh Bechari Chinkhti-Chillati, Ruhjati, Lekin Us Sang-Dil(Patther Dil) Wa Saffak(Be-Raham) Baap par Zara Asar Na Hota,
Beitiyo ko Zinda Dargour(Dafn) karne ki ye Qabeeh(Buri) Rasm Taqriban Arab ke Tamaam Qabaail (Qabeelo) me Kam wa Beish(Thodi Bahot) Raaij thi, Lekin Banu Tameem me Iska Revaaj Bahot Zyada tha,
Islaam ne Is Zaalimana Rasme-Bad ki Mukhaalifat ki Aur Baccho ki Peidaish wa Parwarish par Sawaab wa Jannat ka Mus-da diya Aur Loug Ju Ju Islaam Aur NABI E REHMAT Sallallaho Alayhe Wasallam ke Qareeb Aate gaye, Maraasim Jaahiliyat(Jahaalat se Bhari Rasmo) se Beizaari Badhti gayi Aur Islaam ke Daamane Rehmat me Loug Aafiyat (Salaamati) Mehsus karne lage, Jo Loug Islaam se Pehle Mujassam Khudaao ke Saamne Sar Teka karte the Woh KHUDA e WAAHID ke Parastaar Ban gaye.
(Seerate Mustafa Jane Rehmat ﷺ, Jild-1, Safa-158-160)
ALLAHU AKBER..
>➤ Arab me Aulaade Hazrate Ismaail Alayhis Salaam :-
✥════════════════════════════════════ ✥
Hazrate Ismaail Alayhis Salaam ke 12 Beite hue Aur Inki Aulaad me KHUDA WANDE QUDDUS ne Is Qadar Barkat Ataa Farmaayi ki Woh Bahot Jald Tamaam Arab me Feil gaye Yaha Tak ki Magrib(West/Pachhim) me Misr ke Qareeb Tak Inki Aabaadiya Ja Pahonchi Aur Junub(South) ki Taraf Inke Kheime Yaman Tak Pahonch gaye Aur Shomaal(North/Uttar) ki Taraf Inki Bastiya Mulke Shaam me Ja Mili, Hazrate Ismaail Alayhis Salaam ke Ek Farzand Jinka Naam “Qeidaar” tha Bahot hi Naamwar hue Aur Inki Aulaad Khaas Makka me Aabad rahi Aur Yeh Loug Apne Baap ki Tarah Hameisha Ka’ba e Muazzamma ki Khidmat karte rahe Jisko Duniya me Touhid ki Sab se Pehli Darshgaah hone ka Sharf Haasil he,
Inhi Qeidaar ki Aulaad me “Adnaan” Naami Nihaayat Ulul Azm Shaksh Peida hue Aur Adnaan ki Aulaad me Chand Pushto ke Baad “Qasi” Bahot hi Jaaho Jalaal Wale Shaksh Peida hue Jinhone Makka e Mukarrama me Mushtarika Hukumat ki Buniyaad Par San 440 Isvi-san me Ek Saltanat Qaayam ki Aur Ek Qoumi Majlis(Parliament) Banaai Jo “Daarunnadwa” ke Naam se Mashoor he Aur Apna Ek Qoumi Jhanda Banaya Jisko “Livaa” kehte the Aur Mandarja-Zeil 4 Ohde Qaayam kiye, Jinki Zimmedaari 4 Qabilo ko Sonp di,
1) Rifaadah, 2) Saqaayah, 3) Hijaabah, 4) Qiyaadah,
“Qasi” ke Baad Inke Farzand “Abde Manaaf” Apne Baap ke Janashin hue Fir Inke Farzand “Haashim” Fir Inke Farzand “Abdul Muttalib” Yake Baad Digare(Ek ke Baad) Ek Dusre ke Janashin hote rahe, Inhi Abdul Muttalib ke Farzand Hazrate Abdullah he, Jinke Farzande Arjumand Humaare HUZOOR RAHMATULLIL AALAMIN Sallallaho Ta’ala Alayhe Wasallam he, Jinki Muqaddas Seerate Paak Likhne ka KHUDA WANDE AALAM ne Apne Fazl se Hum ko Sharf Ataa Farmaaya he.
(Seerate MUSTAFA ﷺ, (Hazrat Abdul Mustafa Aazmi Rahmatullahe Alay), Safa-44,45)
>➤ Zamzam ka Suraakh :-
✥═════════════════ ✥
Banu Jarhum Ko Banu Khaza’a ne Jab Makka se Jalawatan(Watan se Nikala) Kiya to Unhone Beitullah Shareef ke Andar Sone(Gold) ke Jo 2 Hiran Aaaviza(Latkaye) the Aur Talwaare, Zar(Gold) Aur Digar Qeemti Saamaan Woh Sab Zamzam ke Kunwe(Well) me Feinka Fir Usko Mitti se Bhar diya, Taaki Banu Khaza’a Wageira Unse Faayda Na Utha Sake, Chunanche Senkado Saal Zamzam Bandh Padha raha Hatta ki Lougo ke Zeheno se Uski Yaad Aur Uski Ahemiyat Mahv(Mit) ho gayi, Loug Makka ke Dusre Kunwe se Apni Zaruriyaat Puri Karne Lage,
Imaam Abul Qaasim Sahili “الروض الانف” me likhte he ki
Banu Jarhum ki Badkaariyo ke Natije me Zamzam ka Paani Khushk (Sukh) ho gaya tha Aur Is Ne’amat se ALLAH TA’ALA ne Unhe Mehrum kar diya tha,
Ek Rouz Abdul Muttalib Hateem me So rahe the, Kisi ne Khwaab me Aaakar Kaha “احفر طيبه”… Taiba ko Khoudo, Unhone Puchha ‘طيبه’ Kya he…?? To Kehne Wala Gaayab ho gaya, Dusri Raat Fir Jab Woh Apne Bistar par Aakar Leite, Aankh lagi to Us Shaksh ne fir Kaha “احفر بره”.. Barrah ko Khoudo, Aapne Puchha ‘بره’ kya he…?? To Fir Woh Gaayab ho gaya, Tisri Raat fir Khwaab me Aaawaz Aayi “احفر مضنونه”.. Maznunah ko Khoudo, Aapne Puchha ‘مضمونه’ Kya he…?? Woh Fir Gaayab ho gaya, Jab Chothi Raat Aayi Aur Woh Apni Khwaab-Gaah me Aaram karne ke liye Leite, To Aankh Lagte hi Aawaaz Aayi “احفر زمزم”… Zamzam Khoudo, Aapne Puchha ‘زمزم’ kya he…?? Aaj Us Shaksh ne Tafseelaat Bataate hue Kaha
Zamzam Teire Pedar Naamur (Baap) ki Meeraas(Jaagir,Warsa) he, Ye Chashma Na Uska Paani Khatm hota he Aur Na Uski Marammat ki Jati he Us se Hajjaj Kiraam ko Seiraab Kiya Jata he, Ye Goubar Aur Khun ke Darmiyaan me he, Jaha Kala Kawwa Chonche Maar raha he, Chintiyo ki Basti ke Bilqul Qareeb,
Jab Tafseelaat ka Ilm ho gaya To Dusre Roz(Din) Aap Apne Beite Haaris(Us Waqt Unka Yahi Ek Beita Tha) ke Hamraah Kodaal(Zameen Khoudne ka Auzaar) le kar Aagaye, Asaaf Aur Naamela ke Darmiyaan Jaha Mushrikeen Buto ke liye Qurbaani ke Jaanwar Zabah kiya karte the, Waha Pahonche, Deikha Waha Ek Siyaah (Kala) Rang ka Kawwa Chonche Maar raha he, Khudaai Shuru kardi, Yaha Tak ki Woh Ek Aysi Teh Tak Pahonch gaye Jis se Kaamyaabi ke Imkaanaat(Mumkin hone ki Suratehaal) Roushan ho gaye, Aapne Farte Musarrat (Zyada Khushi) se ALLAHU AKBER ka Na’ara Buland kiya.
(Seerate Mustafa Jane Rehmat ﷺ, Jild-1, Safa-188-189)
Subhan Allah..
>➤ Zamzam ke Kunwe ko Khoudne me Zhagda Aur Hazrat Abdul Muttalib ki Karaamat :-
✥═══════════════════════════════════════════════ ✥
Quraish ne Ibtedaa me to Is Kaavish(Khouj) ko Saee La Haasil(Na Hasil hoga) Samajhte hue Koi Parwaah Na ki, Lekin Jab Kaamyaabiyo ke Aaasar Numaya hone Lage To Unhone Muta’alba Shuru kar diya ki Chah Zamzam Hum Sab ke Baap ka Kunwa he Is liye Hume bhi Iske Khoud ne me Shareek karo, Aapne(Hazrat Abdul Muttalib ne) Saaf Inkaar kar diya Aur Farmaya Ye Ina’am ALLAH TA’ALA ne Sirf Mujh par kiya he, Isme Kisi ki Shirkat (Hissedaari) Mai Manzur Nahi Karunga, Unhone Kaha Hum Aap ko Iske Khoud ne ki Ijaazat Nahi deinge, Jab Jhagda Zyada Badha to Ye Tai Paya ki Dono Fareeq (Giroh) kisi ko Apna Saalis(Feishla Karne wala) Muqarrar karle Jo Feisla Woh de Us par Sab Amal karenge, Jang Aur Khun-Rezi se Bachne ki Yahi Ek Surat thi,
Chunanche Bani Sa’ad Bin Hazeem ki Kaahin ko Hukm Muqarrar kiya gaya, Fareeqein Apne Apne Humraahiyo ke Sath Uski Taraf Rawana Hue, Bani Sa’ad ka Qabeela Sham ki Sarhad ke Qareeb Rahaaish-Pazeed(Thehra Huwa) tha, Raaste me Chatiyal Meidaan(Jaha Pani wa Saya Na ho) Aur Be-Aaab wa Giyaah(Bina Pani wa Sabze) Sahraav(Registaan) se Guzarna Padhta tha, Asnaae Safar(Safar ke Darmiyaan) Hazrat Abdul Muttalib ke Paani ka Zakhira(Jama Pani) Khatm ho gaya, Unhone Dusre Fareeq se Paani Talab kiya, Unhone Saaf Inkaar kar diya Aur Ye Loug Shiddat e Pyaas se Nidhal(Kamzor) hote ja rahe the, Mout Saamne Nazar Aane lagi thi, Hazrat Abdul Muttalib ne Saathiyo se Mashwara karke Ye Taiy kiya ki Sab Loug Apni Apni Qabr ka Ghadha Khoude, Jab Koi Dum Tod de to Use Uske Ghadhe me Dafan kar diya jaaye Aakhir me Jo Aadmi Rah Jaayega Agar Usko Kisine Dafan Na kiya to Koi Harj Nahi, Bajaaye Iske ki Sabki Laashe Be Gour(Qabr) wa Kafan Padhi rahe Is se Behtar ye he ki Aakhri Aadmi Tajhiz(Taiyyari) wa Takfeen(Kafan se Dafn) se Mehrum rah jaaye, Chunanche Har Ek ne Apni Apni Qabr ka Ghadha Taiyyar kar liya Aur Mout ka Intezaar karne lage, Hazrat Abdul Muttalib ne Fir kaha Yu Hath par Hath Dhare Beithe rehna Aur Mout ka Intezaar karna koi Jawa-Mardi Nahi, Utho Jab Tak Jism me Jaan he, Qadam Aage Badhate he, Mumkin he ALLAH TA’ALA Humaare Bachne ka Koi Saamaan Muhayya(Taiyyar) Farma de, Chunanche Sabne Apne Unto (Camel) par kajaave kase Aur Un par Sawaar ho gaye, Jab Hazrat Abdul Muttalib ne Apna Unt Uthaya to Uske Paaun(Peir) ke Niche se Chasma Ubal Padha, Paani Thanda bhi Tha Aur Meetha bhi, Sabne Khub Seir ho kar Peeya Aur Apne Mashkize bhi Bhar liye, Aapne Apne Saathiyo ko Farmaya ki Dusre Fareeq ko bhi Kaho, Woh bhi Is Chasme se Ji Bhar kar Paani Pee le Aur Apne Bartan bhar le, Baaz Dosto ne Is par Apni Na-Gawaari ka Izhaar kiya ki Jab Hum ne Unse Paani Manga to Unhone Inkaar kar diya, Ab Hum Unhe Apne Paani se Peene ki Ijaazat kyu de…, Hazrat Abdul Muttalib ne Farmaya Agar Hum bhi Aysa hi Kare to Fir Hum me Aur Unme Kya Farq Baaqi rah jaayega, Aapne Apne Made Muqaabil Fareeq ko Da’waat di ke Woh Aaye Aur Is Chasme se Apni Pyaas Bhujaaye,
Jab Fareeqe Saani(Dusre Giroh) ne Aap ki ye Karaamat deikhi To Kaha Abdul Muttalib Ab Aage Jane ki Zarurat Nahi, ALLAH TA’ALA ne Feisla Farma diya, Jab Usne Is Laq wa Daq Shahra(Registaan) me Tumhaare Unt ke Paaun(Peir) ki Thokar se Chasma Jari kar diya he to Zamzam bhi Sirf Tumhaara he, Hum Isme Hissa-Dari ka Da’waa Waapas leite he, Chunanche (Dono) Giroh Waapas Aagaye,
(Seerate Mustafa Jane Rehmat ﷺ, Jild-1, Safa-189-190)
Subhan Allah…
>➤ Hazrat Abdul Muttalib ki Shan wa Shokat :-
✥════════════════════════════ ✥
Hazrat Abdul Muttalib ne Khudaai Mukammal ki, Sone(Gold) ke 2 Hiran, Qeemti Talwaare Aur Zar(Gold), bhi Baraamad ho gaye, Qoum ne Un Chizo se Hisse ka Muta’alba Shuru kar diya, Jhagde ne Fir Sangeen Surat Ikhteyaar karli, Aapne Kaha Aao Ba-Zariya e Faal Iska Feisla Kare, Faal ki Ye Surat Tajwiz hui ki 2 Hisse Ka’aba ke, 2 Hisse Abdul Muttalib ke Aur 2 Hisse Baaqi Qoum ke, Qur’aa-Andaazi(Teer Feinkna) ki gayi To Ka’aba ke Hiss ke 2 Teer Do Do Hirno par, Hazrat Abdul Muttalib ke 2 Teer Talwaaro Aur Zarho par Padhe Aur Qoum ke 2 Teer Khali Nikle, Aapne Sone(Gold) ke Hirano ko Gala kar Sone ke Patar Banwaaye Aur Ka’aba Shareef ke Darwaaze par Mundh(Laga) diye, Baaz Riwaayaat me he ki Woh 2 Mindhe rakh diye gaye Jo Baad me Chori ho gaye,
Abdul Muttalib Apne Azeemus-Shan Kaarnamo, Apne Be-Misl Jud(Shakhawat) wa Ataa, Apni Buland Himmat Aur Khsaaile Hameeda(Neik Aadato) ke Baais Saari Qoum ki Aankho ke Taare, Saare Arab ke liye Wajahe Naazish(Naaz) the, Ek Jaleelul Qadr Baap ke Beite the, Tarikhe Aalam ka Rukh Feir deine ki Salaahiyato se Maala-Maal Das(10) Beito ke Baap the, Ek Roz(Din) Aap Hateem me Tashreef Farma the Aapke Das(10) Beite Sheiro ki Tarah Aapke Gird(Aage-Pichhe) Halqa(Gheraao) Banaaye Beithe the ki Ek A’arabi Waha Se Guzra, Ye Manzar deikh kar Be-Shakhta Uski Zabaan se Nikla
“اذا احب الله انشاء دولة خلق له امثال ھو لاء”
ALLAH TA’ALA Jab Koi Mamlokat (Saltanat) Banana Pasand Karta he To Uske Qeyaam(Qayam karne) ke liye Is Qism ke Jawaan Mard Peida Farma diya karta he.
(Seerate Mustafa Jane Rehmat ﷺ, Jild-1, Safa-191)
>➤ Ashhabe Feel ka Waaqiya :-
✥══════════════════ ✥
>> Ashhabe Feel ka Waaqiya kyu Peish Aaya….?
Quraane Paak me ALLAH TA’ALA Irshaad Farmaata he
“Ay Mehboob Kya Tumne Na deikha Tumhaare RABB ne Un Hathi Walo ka Kya Haal kiya”
(Surah Feel, Aayat-01)
HUZOOR NABI E KAREEM Sallallaho Alayhe Wasallam ki Paidaish se 55 Din Pehle Ek Waaqiya Peish Aaya Jo Ashaabe Feel ka Waaqiye se Mashoor he,
Hazrat Abdul Muttalib ki Zindagi ka Ek Azeem Waaqiya Khana e Ka’aba par ‘Abraha’ ki Lashkar-Kashi(Hamla) he, Shah Habsa(Habsa ke Badshah) ne Yaman Fatah Karne ke Baad ‘Aryaat’ ko Apna Governor Muqarrar kiya Aur Abraha ko Iska Naayab Muta’ayyan’ kiya,
Jald hi Unme Iqtedaar(Authority) ki Kashm-kash Shuru ho gayi, Chunanche Dono ke Lashkar Jang ke liye Saff-Aaara(Jang ke Liye Taiyyar) ho gaye, Abraha ne Taja’wuz(Baat) Peish ki ke Bajaaye Iske ki Hum Apni Fouzo ko Ladaaye Aur Awaam ko Mout ke Ghaat Utare, Behtar ye he ki Hum Aapas me Zour-Aazmai kare, Hum me se Jo Gaalib Aajaye Saari Fouz Uske Parcham ke Niche Jama ho jaaye, Aryaat ne Abraha ki Tajveez ko Pasand kiya, Dono Asleha(Jangi Hathiyaaro) se Aaarasta(Taiyyar) ho kar Meidaan me Aaye Aur Baahami(Darmiyaani) Jang Shuru ho gayi, Jisme Aryaat Mara gaya Aur Iqtedaar(Authority) Abraha ko Muntaqil ho gaya, Usne Shahe Habsha(Habsha ke Badshah) ko Khush karne ke liye Ek Azeemus Shan Intehaai Khubsurat Girja(Ishaiyo ka Ibaadat-khana/Church) Ta’amir kiya Aur Apne Baadshah ko Khat likha ki Mai Chahta hu ki Jo Loug Makka me Hajje Ka’aba ke liye Jate he, Unko Yaha Hajj karne ki Da’wat du Aur Agar Woh Is Da’wat ko Qabul Na Kare To Ka’aba ko Piwande Khak(Zameen-Dosh) Kardu, Jab Ka’aba hi Moujud Nahi rahega To Loug Khwaah-Makhwaah Is Kaneesa(Church) ka Hajj karne Aur Uske Tawaaf karne ke liye Yaha Aane Lagenge,
Ahle Arab(Arab walo) ko Jab Abraha ke Is Mazmum(Bure) Iraade ka Ilm huwa To Unke Geiz wa Gazab(Gum wa Gussa) ki Intehaa Na rahi, Chunanche Bani Kanaanah ka Ek Fard Apni Naarazgi ke Izhaar ke liye Kaneesa(Church) me gaya Aur Fursat Pa kar Waha Qaza e Haajat(Pakhana/Toilet) karke Use Ganda kar diya, Jab Is Waaqiya ki Ittela Abraha ko Mili To Uske Seene me Aatas(Soula/Aaag) Inteqaam Bhadak Uthi Aur Bade Joush wa Kharosh se Usne Makka par Hamla karne ki Taiyyari Shuru kardi,
(Seerate Mustafa Jane Rehmat ﷺ, Jild-1, Safa-191, 192)
>> Abraha ka Ka’aba Shafeef ko Dhane ke liye Nikalna :-
Ahle Yaman bhi Ka’aba Shareef ki Deel se Izzat wa Takrim(Ta’azim) karte the, Unhone Jab ye Baat Sooni to Uske Sath Jang karne ka Azm(Iraada) kar liya, Yaman ke Ek Sardaar Zunafr ne Apni Qoum ko Abraha ke Sath Jang karne ki Da’wat di Taki Woh Beitullah Shareef ko Uski Na-Pak Koshisho se Bacha Sake,
Fareeqein(Dono Giroh) me Zabardast Jang hui Lekin Zunafr Aur Uske Saathiyo ko Shikast(Haar) hui Aur Usko Jangi Qeidi Bana kar Abraha ke Saamne Peish kiya gaya, Abraha ne Usko Qatl karna ka Irada kiya, Zunafr ne kaha Ay Baadshah Tu Mujhe Qatl na kar Balki Meiri Zindagi Teire liye Qatl se Zyada Faayde-Mand Sabit hogi, Abraha ne Uski Jaan Bakhshi ki Lekin Usko Muqqaiyyad(Qeidi) rakha, Waha se Abraha Rawana huwa, Bani Khush’am ke Ilaaqe se Guzra To Nafeel Bin Habeeb Khush’ami ne Qabaaile Arab ko Sath Mila kar Uske Sath Jang ki Lekin Is Dafa’a bhi Fatah(Qaamyaabi) Abraha ko Nasib hui, Nafeel Jab Qeidi Bana kar Uske Saamne Peish kiya gaya To Nafeel ne kaha Ay Baadshah Mujhe Qatl Na kar, Sarzamine Arab me Tumhaare liye Raahnuma ka Kaam Karunga Aur Mei Khush’am ke 2 Qabilo Shahraan Aur Naahas ki Taraf se Izhaare Ita’at(Farma-Bardaari ka Izhaar) ke liye Apne Dono Hath Teiri Khidmat me Peish karta hu, Abraha ne Usko Mu’aaf Kar diya, Jab Abraha ne Makka e Mukarrama ki Taraf Peish-Qadmi(Aage Badhna) Shuru ki To Nafeel Batoure Raahnuma Uske Humraah tha,
Jab Abraha ka Guzar Taaif se huwa To Mas’ud Saqfi Apne Qabeele Saqeef ke Chand Aadmiyo ko Humraah le kar Uski Peishwaai ke liye Nikla Aur Us se Kaha Ay Baadshah Hum Teire Gulaam he, Hum Teire Har Hukm ki Ita’at karne Wale he, Humaare Dilo me Teiri Mukhaalifat ka Koi Shaiba(Shak) Nahi Aur Humaara Ye Ma’abud Nahi Jisko Giraane ke liye Tu Nikla he, Woh Makka me he, Hum Tumhaare Sath Aysa Aadmi Bheijenge Jo Tumhaari Raahnumai karega, Taaif me Jo Ma’abud tha Usme Unhone ‘Laat'(Butt/Murti ka Naam) ka Butt rakha huwa tha, Uski Parastis(Ibaadat) ki Jati thi Aur Uske Kothe ka Tawaaf kiya jata tha, Ahle Taaif ne Abraha ke Sath Abu Regaal Nami Ek Shaksh ko Bheija Taki Woh Use Makka Jane ka Rasta Bataaye, Abraha Abu Regaal ki Ma’iyyat(Sath) me Taaif se Rawana huwa, Jab Magmas Pahoncha to Yaha Usne Aaaram ke liye Qayaam kiya, Abu Regaal ki Zindagi ki Mohallat Puri ho gayi, Wahi Woh Halaak (Barbaad/Mout) ho gaya Aur Use Wahi Zameen me Daba diya gaya, Ahle Arab Jab bhi Waha se Guzarte he to Abu Regaal ki Qabr par Sang-Baari(Patthraav) karte he,
(Seerate Mustafa Jane Rehmat ﷺ, Jild-1, Safa-192, 193)
>> Abraha ke Khadimo ka Hazrat Abdul Muttalib ke Unto ko Haank Lana :-
Abraha ke Ek Habshi Fouzi Afsar Jiska Naam Aswad Bin Maqshud tha, Jo Uske Ghode-Sawaar Daste ka Afsar tha, (Usko) Makka ki Taraf Bheija, Tahaama ki Charaagaho(Janwaro ke Charne ki Jagah) me Qureish Aur Digar(Dusre) Qabaail(Qabilo) ke Jo Unt Char rahe the Unko Haank kar Woh Abraha ke Paas le Aaya, Un Unto(Camel) me 200 Unt Hazrat Abdul Muttalib ke bhi the, Aap Us Waqt Quraish ke Sardaar the, Kanaana Huzeil ke Qabaail ne Irada kiya ki Abraha ka Muqaabala kare, Lekin Uski Be-Panah Quwwat ke Saamne Apne Aap ko Be-Bas Mehsus kiya, Is liye Us se Ladaai ka Iraada Tark (Chhod) kar diya, Abraha ne Apna Khas Qaasid(Paigaam le jane wala) Ahle Makka ki Taraf Rawana kiya, Uska Naam “Hebaatul Humeiri” tha, ki Tum Jaao Aur Us Shahar ka Jo Rais he Us se Ja kar Mulaaqaat karo Aur Use ye Kaho ki Baadshah Tumhe Kehta he ki Mai Tumhaare Sath Jang Karne ke liye Nahi Aaya, Mai To Is Ka’aba ko Giraane ke liye Aaya hu, Agar Tum Meire Raaste me Haail(Bich me) Na ho to Mujhe Tumhaare Khun-Reizi ki Koi Zarurat Nahi Aur Agar Woh Meire Sath Jang Karne ka Iraada Na Rakhta ho to Usko Meire Paas le Aana,
Hebaat Jab Makka me Daakhil huwa To Usne Puchha ki Quraish ka Sardaar kon he…?? Use Bataya gaya ki Abdul Muttalib Bin Haashim Apni Qoum ke Sardaar he, Ye Shaksh Unke Paas Gaya Aur Abraha ka Peigaam Pahonchaya, Hazrat Abdul Muttalib ne kaha Bakhuda Hum Uske Sath Jang ka Iraada Nahi Rakhte Aur Na Humaare Paas Ye Taaqat he ki Uske Sath Ladaai Kar Sake, Ye ALLAH TA’ALA ka Hurmat Wala(Azmatwala) Ghar he Aur Is Ghar ko Iske Khaleel Hazrat Ibhraahim Alayhis Salaam ne Ta’amir kiya he, Agar Woh Khud Iski Hifaazat ka Bandobast kare to Ye Uska Ghar he Aur Uska Haram he Aur Agar Woh Khud Abraha ki Mozaahamat(Rukaawat) Na kare Aur Usko Apna Ghar Giraane de to Uski Marzi, Hum me Taaqat Nahi ki Abraha ka Muqaabala kar Sake, Jab Hebaat ko Yaqeen ho gaya ki Ahle Makka Abraha ke Sath Jang Karne ka Koi Iraada Nahi Rakhte To Usne Hazrat Abdul Muttalib ko Abraha ke Paas Jane ko kaha,
Hazrat Abdul Muttalib Apne Chand Beito ke Humraah Hebaat ke Sath Abraha ki Taraf Rawana hue, Jab Uske Lashkar me Pahonche To Aapne Zunafr ke Baare me Puchha, Woh Aap ka Purana Dost tha, Aapko Uske Paas le Jaya gaya, Jaha Woh Mahbus(Qeid) tha, Aapne Us se Kaha Ay Zunafr Jo Musibat Hum par Naazil hui kya Usme Tum Humaare Kisi Kaam Aa Sakte ho…?? Usne kaha Mai Ek Be-Bas Qeidi hu, Baadshah Jab Chahe Mujhe Mout ke Ghat Utaar de, Is Haalat me Mai Tumhaari Kya Khidmat Baja la Sakta hu, Albatta Abraha ke Hathi ka Saais(Khidmat karnwala) Jiska Naam Anees he Woh Meira Dost he, Mai Usko Bula kar Aapka Ta’aruf(Introduction) kara deita hu, Woh Baadshah se Aapki Mulaaqaat kar deiga, Mumkin he Is Musibat se Naja’at ki koi Surat Nikal Aaye, Chunanche Usne Anees ko Bulaya Aur Us se Abdul Muttalib ka Ta’aruf karaya ki Ye Quresh ke Sardaar he Aur Makka ke Tejaarati Karwaa(Kaarobar) ke Sarbara he, Inki Shakhawat ki ye Kefiyat he ki Inka Dastarkhwaan Har Waqt Bichha Rehta he, Insaan to Insaan Pahado ki Chotiyo par Baseira karne Wale Darinde bhi Inke Dastarkhwaan se Apne Peit Bharte he, Baadshah ke Mulaazmin(Khadim) Inke 200 Unt Haank kar le Aaye he, Tum Inki Jo Madad Kar Sakte ho Zarur karo, Usne Wa’ada kiya, Anees Abraha ke Paas gaya Aur Hazrat Abdul Muttalib ka Ta’aruf karaya Aur Unki Mulaaqaat ki Ijaazat le li.
(Seerate Mustafa Jane Rehmat ﷺ, Jild-1, Safa-194, 195)
>> Abraha Aur Hazrat Abdul Muttalib ki Guftagu:-
Hazrat Abdul Muttalib Saahibe Husn wa Jamaal the, Chehre se Wajaahat (Khubsurat) Aur Sharaafat (Izzat) ke Aasar Numaya the, Abraha ne Jab Aapko Deikha, Aapki Badi Ta’zim ki, Bade Aaadab Baja laya Aur ye Pasand Na kiya ki Khud Takht ke Upar Bheithe Aur Unhe Niche Bithaaye Aur Ye Bhi Munaasib Na Samjha ki Unko Apne Sath Takht Par Bithaye Mobaad Lashkar ke Loug Uska Bura Maane, Chunanche Abraha Apne Takht se Niche Utra Aur Qaalin par Beith gaya Aur Aapko bhi Apne Pehlu me Sath Qaalin par Bithaya, Fir Tarjumaan(Tarjuma Karne wala) se Kaha Inse Puchho ye Kis Kaam ke liye Aaye he..??
Aap ne Jawaab diya ki Mai Is liye Aaya hu ki Baadshah ke Sipaahiyo ne Meire 200 Unt Pakad liye he, Woh Mujhe Waapas diye Jaaye, Abraha ne Tarjumaan ko kaha ki Inhe Kaho ki Jab Maine Aapko Deikha tha Mai Aapse Bahot Muta’assir(Deel par Asar) huwa tha, Lekin Jab Aapne Baat ki he To Aap ki Qadr Wa Manzelat(Martaba) Meiri Aankho se Gir gayi he, Aap 200 Unt ke Bare me to Mujh se Guftagu karte he, Lekin Us Ghar ke Baare me Kuchh Nahi kehte Jisko Mai Girane ke liye Aaya hu, Halaanki Woh Ghar Aapka Aur Aapke Aaaba wa Ajdaad(Baap-Daada) ka Deen he, Aapne Jawaab diya ki Mai Unto ka Maalik hu Aur Us Ghar ka Ek Maalik he Woh Khud Uski Hifaazat Farmaayega, Abraha ne Bade Gurur se Kaha Koi Bhi Meire Zad(Waar) se Ka’aba ko Nahi Bacha Sakta Aapne Farmaya Tu Jane Aur Woh Jaane,
Hazrat Abdul Muttalib Abraha ki Mulaaqaat ke Baad Waapas Aagaye Aur Quraish ko Sare Haalaat se Aaagaah kiya Aur Unhe Hukm diya ki Woh Makka se Nikal Jaaye Aur Pahaado ki Gaaro Aur Chotiyo me Panaah-Guzi(Mehfuz Jagah par Pahonchna) ho jaaye, Mobbad Abrahaaha ka Lashkar Makka me Daakhil ho kar Unko Hadafe Sitam(Zulm ka Nishana) Banaaye, Fir Apne Sath Chand Aadmiyo ko Lekar Khana e Ka’aba ke Paas Aaye Aur Uske Halqa(Kundi) ko Pakad kar ALLAH TA’ALA ki Janaab(Baargaah) me Fariyaad Karne lage Aur Abraha Aur Uske Lashkar par Fatah wa Nusrat(Madad) ki Darkhwaast karne lage, Us Waqt Abdul Muttalib ne Baargaahe ILAAHI me Arz ki
“لاهم ان العبد يمنع رحله فامنع حلالك،
لا يغلبن صليبهم و محالهم غدو امحالك،
ان كنت تاركهم و قبلتنا فامر مابدالك،”
Ay ALLAH.. Banda bhi Apne Kajaave(Ek Tarah ki Lakdi) ki Hifaazat karta he, Tu bhi Apne Ghar ki Hifaazat Farma, Aysa Na ho ki Unki Shaleeb(Crucifix) kal Teire Ghar par Gaalib Aajaye Aur Nasab(Qaayam) kar di jaye Aur Agar Tu Unko Aur Humaare Qabile ko Aaazad Chhod ne Wala he, Tu Jis Tarah Teiri Marzi ho Tu Us Tarah kar, Is Duaa ke Baad Abdul Muttalib bhi Ek Pahaad ke Gaar me Chale gaye,
Allama Mulla Ali Qari Hazrat Abdul Muttalib ke Fazaail me likhte he
Jab Quraish Haram se Nikal Gaye Aur Ashaabe Feel(Hathiwalo) ne Hamla kiya To Hazrat Abdul Muttalib ne kaha Bakhuda ALLAH ke Haram se Hargiz Nahi Niklunga Taki Uske Alawa Kisi Aur ke Paas Izzat Talaash karu, Mai To ALLAH TA’ALA ke Badle me Aur Kisi Chiz ka Mutamanni(Tamanna rakhne wala) Nahi,
(Seerate Mustafa Jane Rehmat ﷺ, Jild-1, Safa-195, 196)
ALLAHU AKBER…
>> Abraha ke Lashkar ka Anzaam :-
Quraane Paak me ALLAH SUBHANAHU WA TA’ALA Irshaad Farmaata he
“Ay Mahboob Kya Tumne Na deikha Tumhaare RABB ne Un Hathi Walo ka Kya Haal kiya, Kya Unka Daanw Tabaahi me Na dala, Aur Unpar Parindo ki Tukadiya Bheiji, ki Unhe Kankar ke Pattharo se Maarte, To Unhe kar Dala Jeise Khai Kheiti ki Patti”.
(Surah Feel, Aayat-1,2,3,4,5)
Dusre Din Subah Abhrahma ne Makka par Humla karne ka Iraada kiya, Apne Hathi Jiska Naam “Mahmud” tha Usko Aur Apne Lashkar ko Taiyyar kiya, Abraha ne Ka’aba ko Munhadim(Gira) karne ka Pukhta Azam(Iraada) kar liya tha Aur Uske Baad Woh Yaman Waapas Jana Chahta tha, Jab Unhone Hathi ko Makka ki Taraf Mutawajje kiya To Nafeel Bin Habeeb Aaya Aur Hathi ke Pehlu ke Sath Khada ho gaya, Uska Kaan Pakad liya, Fir Use Kaha ki
“Ay Mahmud (Abraha ke Hathi ka Naam) Beith Jaao Jidhar se Aaye ho Udhar Lout Jaao Kyuki Tu ALLAH ke Muqaddas Shahar me he”,
Ye Soonte hi Hathi Beith gaya, Nafeel Bin Habeeb Waha se Nikla Aur Doudta Huwa Pahaad ki Choti par Chad gaya, Unhone Hathi ko Mara Taki Woh Khada ho Lekin Usne Khade hone se Goya Inkaar kar diya Fir Unhone Uske Sar me Tabarzein se Chonte Lagaayi Lekin Fir bhi Woh Na Utha Fir Unhone Uske Peit ke Niche Ayse Asaa(Lathi) se Charke(Halke Zakhm) Lagaaye Jiska Senaan(Nok) Tedha kiya huwa tha Woh Lahu-Luhaan ho gaya Lekin Fir Uthne ka Naam Na Liya Fir Unhone Uska Rukh Yaman ki Taraf kiya To Woh Bhagne laga, Jab Fir Makka ki Taraf Unhone Uska Rukh kiya To Fir Beith gaya Isi Asna’a(Waqt) me Abaabil(Chhoti si Chidiya) ki Ek Tukdi Samandar ki Taraf se Udti hui Aayi Har Parinde ki Chonch Aur Dono Panjo me Ek Ek Kankari thi Jiski Miqdaar(Hadd) Chane Aur Masoor ke Dano ke Baraabar thi Jiske Sar par Woh Girti Uske Foulaadi Khud(Mazbut Jism) ko Chirti hui Uske Jism ke Paar ho Jati, Lashkar me Bhag-Doud Mach gayi Woh Raasta Dhundhna Chahte the Jis par Chal kar Woh Aaye the Lekin Woh Mil Nahi Raha tha, Unhone Nafeel Bin Habeeb Jo Unka Rahnuma Ban kar Unke Sath Aaya tha Usko Talaash kiya Taki Woh Unhe Yaman ka Raasta Bataaye To Uska Waha Naam wa Nishan hi Na Tha Woh To Bhag kar Pahaad ki Choti par Chala gaya tha Aur Unpar KHUDA ke Azaab ka Holnaak Manzar Apni Aankho se Deikha raha tha,
Abraha ke Lashkar me 13 Hathi the, ‘Mahmud’ ke Alawa Saare Hathi Halaak ho gaye Aur Mahmud ne Kyuki Haram Shareef ki Taraf Peish-Qadmi(Aage Badhne) se Inkaar kiya tha Is liye Woh Bach gaya Woh Waha se Bhag Nikla Lekin Jinko Woh Patther lage Unme se Koi Salaamat Na Bacha, Abraha ki Haalat Badi Qaabile Raham thi Usko le kar Waha se Bhage Lekin Raasta me Uska Ang Ang(Jism) Gul kar Girne laga, Uske Jism me Peep Aur Khun Saraayat(Mil) kar gaya Jis se Gazab ki Bu Aati thi Aur Jab Usko le kar Woh Sanaa’a Pahonche to Woh Parinde ke Ek Chuze ki Tarah tha Lekin Marne se Pehle Uska Seena Fhat gaya Aur Deel Baahar Aagaya Is Tarah Woh Ek Aziyyat-Naak(Dardnaak) Mout se Do-Char huwa,
Ye Waaqiya Moharram ko Peish Aaya Aur Yahi Woh Saal he Jisme Fakhre Aadam wa Bani e Aadam Sallallaho Alayhe Wasallam ki Wilaadat e Ba Sa’aadat se Insaaniyat ke Khaza Gulistaan(Viraan Gulistaan) me Bahaar Aayi.
(Seerate Mustafa Jane Rehmat ﷺ, Jild-1, Safa-197,198)
Jab Abraha Aur Uske Lashkaro ka Yeh Anzaam Huwa to Hazrat Abdul Muttalib Pahaad se Niche Utre Aur KHUDA TA’ALA ka Shukr Adaa kiya, Unki Is Karaamat ka Door Door Tak Charcha ho gaya Aur Tamaam Ahle Arab Inko Ek Khuda Raseeda(ALLAH WALA) Buzurg ki Heishiyat se Qaabile Ahteraam Samajhne lage.
(Sharah Zarqaani Alal Mawaahib, Jild-1, Safa-164)
Subhan Allah….
>➤ Quraish :-
✥══════════ ✥
Muslim Shareef ki Riwaayat he ki HUZOOR REHMATE QOUNEIN Sallallaho Alayhe Wasallam ne Irshaad Farmaaya ki
ALLAH TA’ALA ne Hazate Ismaail Alayhis Salaam ki Awlaad me se ‘Kinaana’ ko Bar-Guzida Banaya Aur ‘Kinaana’ me se ‘Quraish’ ko Chuna Aur ‘Quraish’ me se ‘Bani Haashim’ ko Muntakhab Farmaya Aur ‘Bani Haashim’ me se Mujh ko Chun liya.
(Mishkaat Shareef, Fazaaile Saiyyadul Mursalin ﷺ)
Ye Ek Musallama Haqiqat he ki HUZOORE E ANWAR Sallallaho Alayhe Wasallam ka Khandaan Is Qadr Buland Martaba he ki Koi Bhi Hasab wa Nasab wala Aur Ne’amat wa Buzurgi wala HUZOOR Sallallaho Alayhe Wasallam ke Misl Nahi he,
(Seerate MUSTAFA ﷺ, (Hazrat Abdul Mustafa Aazmi Rahmatullahe Alay), Safa-51)
HUZOOR NABI E REHMAT Sallallaho Alayhe Wasallam ke Khandaane Nabuwwat me Sabhi Hazraat Apni Guna Go Khususiyaat ki Wajah se Bade Naami-Giraami(Mashoor) he, Magar Chand Hastiya Aysi he Jo Aasmaane Fazlo Kamaal par Chaand-Taare Ban kar Chamke, In Ba Kamaalo me se “Fuhar Bil Maalik” bhi he Inka Laqab “Quraish” he Aur Inki Awlaad Quraishi ya Quraish kehlaati he,
Fuhar Bil Maalik Qureish Is liye Kehlate he ki ‘Qureish’ Ek Samundari Janwar ka Naam he jo Bahot hi Taaqat war hota he, Aur Samundari Janwaro ko Kha Dalta he Ye Tamaam Janwaro par Hameisha Gaalib rehta he Kabhi Maglub(Haar) Nahi hota Chunki ‘Fuhar Bil Maalik’ Apni Shuja’at(Bahaaduri) Aur Khuda-Daad Taaqat ki Bina par Tamaam Qabaaile Arab par Gaalib the Is liye Tamaam Ahle Arab Inko ‘Quraish’ ke Laqab se Pukaarne lage, Chunanche Is Bare me ‘Samrakh Bin Amr Himyari’ ka Sher Bahot Mashoor he ki
“و قریش ھی التی تسکن البحر”
“بھا سمیت قریش قریشا”
Ya’ani Quraish Ek Jaanwar he jo Samundar me Rehta he, Isi ke Naam par Qabila e Quraish Ka Naam ‘Quraish’ rakh diya gaya.
(Zarqaani Alal Mawaahib, Jild-1, Safa-76)
HUZOOR Sallallaho Alayhe Wasallam ke Waalidein (Maa-Baap) Dono ka Silsila e Nasab ‘Fuhar Bin Maalik’ se Milta he Is liye HUZOOR E AKRAM Sallallaho Alayhe Wasallam Maa-Baap Dono ki Taraf se ‘Quraish’ he.
(Seerate Mustafa Jane Rehmat ﷺ, Jild-1, Safa-403)
>➤ Quraish ke Fazaail :-
✥════════════════ ✥
Quraish ke Fazaail Wa Manaaqib Hadees me Waazeh Tour par Bayaan kiye gaye he Usme se Chand Fazaail Yaha Peish karte he..
HUZOOR NABI E KAREEM Sallallaho Alayhe Wasallam Quraish ke Fazaail Bayaan karte hue Irshaad Farmaate he ki
»» Islami Hukumat ke Waali(Haakim) Quraish he,
»» Quraish Saare Arab ke Sardaar he,
»» Ek Quraish ko Quwwat Do Mardo ke Baraabar he,
»» Jo Quraish ki Zillat Chahe ALLAH TA’ALA Use Zaleel kare,
»» Ay Lougo Quraish par Sabqat(Badhayi) Na Karo ki Halaak ho Jaaoge, Dusri Riwaayat me he ki Qureish par Sabqat Na karo ki Gumraah ho Jaaoge,
»» Quraish ko Apna Peiro(Peirvi Karne wala) Na Banaao Aur Unki Peirvi Karo, Quraish par Da’waa E Ustaazi Na Rakho Aur Unki Shagirdi Karo ki Quraish me Ek Ameen ki Amaanat Do Ameeno ke Baraabar he,
»» Ay Girohe Insaan Quraish se Mohabbat rakho ki Quraish ka Dost Meira Dost he Aur Quraish ka Dushman Meira Dushman he Aur Beishak ALLAH TA’ALA ne Meiri Qoum ki Mohabbat Meire Deel me Daali ki Un par Kisi Inteqaam(Badle) ki Jaldi Nahi karta Na Unke liye Kisi Ne’amat ko Bahot Samjhu,
»» Quraish ko Woh Ataa huwa Jo Kisi ko Na huwa,
»» ALLAH TA’ALA ne Qureish ko Aysi 7 Baato se Fazilat di Jo Na Unse Pehle Kisi ko Mili Na Unke Baad Kisi ko Ataa hogi,
Ek to ye ki Mai(HUZOOR NABI E KAREEM {ﷺ}) Quraish hu,
Inhi me Khilaafat Aur Ka’aba e Muazzama ki Darbaani(Rakhwali) Aur Haajiyo ka Saqaaya,
Inhe Ashhabe Feel par Nusrat(Jeet) Bakhshi,
Inhone Dus Saal ALLAH TA’ALA ki Ibaadat Tanha ki ke Unke Siwa Rooe Zameen par Kisi Aur Khandaan ke Loug Us Waqt Ibaadat Na Karte the,
Aur ALLAH TA’ALA ne Inme Ek Surah Quraane Azeem ki Utaari ki Isme Sirf Inhi ka Zikr Farmaya Aur Woh Surah “لِاِیۡلٰفِ قُرَیۡش”(Surah Quraish) he.
(Seerate Mustafa Jane Rehmat ﷺ, Jild-1, Safa-411-415)
>➤ Hashim :-
✥═════════ ✥
HUZOOR NABI E KAREEM Sallallaho Alayhe Wasallam ke Pardada “Hashim” Badi Shano Shoukat ke Maalik the, Inka Asli Naam ‘Amr’ tha, Intehaahi Bahaadur, Behad Sakhi Aur Aa’la Darje ke Mehmaan Nawaaz the,
Ek Saal Arab me Bahot Shakht Qahat Pad gaya Aur Loug Dane Dane ko Mohtaaj ho gaye to Yeh Mulke Sham se Khushk Routiya Kharid kar Hajj ke Dino me Makka Pahonche Aur Routiya ka Chura karke Unt ke Ghost ke Shorbe me Sarid Bana kar Tamaam Haajiyo ko Khub Peit Bhar kar Khilaya, Us din se Loug Inko “Hashim” (Routiyo ka Chura Karne wala) Kehne lage,
(Madaarijun Nabuwwat, Jild-2, Safa-08)
Chunki yeh “Abde Manaaf” ke Sab Ladko me Bade Aur Ba-Salaahiyat the Is liye Abde Manaaf ke Baad Ka’aba ke Mutawalli(Trustee) Aur Sajjada-Nasheen hue, Bahot Haseen wa Khubsurat Aur Wajeeh(Khush-Mijaaz) the, Jab Sinne-Sho’ur(Housh Sambhalne ki Umar tak) ko Pahonche to Inki Shadi Madeene me Qabila Khazraj ke Ek Sardaar Amr ki Shahib Jaadi se hui Jinka Naam ‘Salma’ tha, Aur Unke Shahib Jaade ‘Abdul Muttalib’ Madeena hi me Peida hue, Chunki Hashim 25 Saal ki Umr Pa kar Mulke Sham ke Raaste me Ba Makaam ‘Gazaa’ Inteqaal kar gaye, Is liye Abdul Muttalib Madeena hi me Apne Nana ke Ghar Pale Badhe, Aur Jab 7 Ya 8 Saal ke ho gaye to Makka Aa kar Apne Khandaan Walo ke Sath rehne lage.
(Seerate Mustafa Jane Rehmat ﷺ, Jild-1, Safa-403-404)
#Seerat #Sirat #Nooranisafar #Noranisafar #Waqiya #Wakiya #Noorulislam #islam #ahle_arab #zinda_dafnana #zamzam #wellofzamzam #abdulmuttalib #ashabefeel #abhraha #ababil #abaabil #quraish #kuresh #hasim #hashim